【紋身都有得純素?II 】
【紋身都有得純素?II 】
上半部分講完含動物成份嘅墨水同保養膏,今次同大家講下純素即係成份包括咩啦!之前提到植物都可以製成甘油嚟取替含動物成份嘅甘油。嚴格嚟講,佢唔係油,係由植物油脂例如棕櫚油、大豆、海藻或椰子萃取出嚟嘅碳水化合物,同含動物成份甘油一樣可以用嚟製造食物、化妝品同藥物。由於佢本來水溶性,質感黏稠,有黏力,所以並兼明膠喺墨水入面黏合嘅角色。
據Urban Vegan,純素墨水亦會含有乙醇同北美金縷梅萃取物,幫助均勻分配墨水,加強皮膚吸引能力,係色素嘅載體。《Journal of Occupational Medicine and Toxicology》曾經指出乙醇可能會刺激到皮膚,所以點解有啲人紋完身會有輕微皮膚反應。
北美金縷梅(Hamamelis virginiana)萃取物取自北美金縷梅灌木嘅葉同樹皮,含有助收縮毛孔同消炎嘅單寧、舒緩紋身後受刺激皮膚嘅原花青素、減少皮膚泛紅同過敏嘅類黃酮,就好似收縮水咁。印第安人會將北美金縷梅嘅葉同樹枝煲滾製成藥膏,搽係有傷口嘅地方。
咁純素墨水啲色素又點嚟呢?Vegan Tattoo Studios指出,普遍純素而無毒嘅基礎成色成分如下:
黑色:碳纖維同原木
白色:二氧化鈦
黃色:薑黃
綠色:孔雀石
藍色:藍銅礦
紅色:萘酚
紫色:二噁嗪同咔唑
值得提及嘅係,曾經有著名純素墨水公司指出純素墨水更安全,對免疫系統更好,但係目前並無科學實驗根據。然而《The Vegan Review》提出純素墨水可以減低皮膚炎嘅風險,因為無含有可能會引致濕疹嘅蟲膠。
「紋身說」發現有客人會對到底純素墨水係咪會比含動物成份嘅墨水易啲甩色有疑問,然而所有紋身都會隨著時間的流逝而稍有褪色,關鍵在於客人紋身後有無做好護理,例如曬太陽個陣搽防曬用品,同墨水係動物成份定植物成份無直接關係。
至於保養膏,純素即係含有維他命A同D、椰子油、乳木果油、荷荷巴油、橄欖油、蘆薈、金盞花同薰衣草等。
「紋身說」留意到雖然市面上有唔少標榜純素墨水同保養膏,但有純素認證嘅卻唔多。我地根據資料搜集,舉出幾隻有第三方認證嘅如下:
提供Material Safety Data Sheet嘅@eternalink 、Kuro Sumi Tattoo Ink、StarBrite、SkinCandy、Stable Color同獲People for the Ethical Treatment of Animals (PETA)認證。而保養膏方面,Merry Hempsters、Nat-A-Tat2同獲United States Department of Agriculture(USDA)同Oregon Tilth Certified Organic (OTCO)認證,Ohana Organics獲(PETA)認證。Inked Magazine亦有提過其實Lush嘅Ultrabalm都可以㗎!