《信仰與紋身：佛教》二之一

佛教有兩大分支：南傳佛教及北傳佛教，兩者分別在於傳播嘅時間同地域不同。佛教起源於印度，先傳到東南亞形成南傳佛教，屬於印度佛教歷史上早期嘅上座部佛教（又稱小乘佛教），而家主要流傳於泰國、緬甸、柬埔寨等；其後往北沿絲綢之路傳到中國，名為「漢傳佛教」，為印度中期嘅大乘佛教，主要流傳於中國漢地、韓國、日本等；再越過喜瑪拉雅山傳到西藏成為「藏傳佛教」，亦即印度晚期嘅密乘佛教，於西藏、蒙古、尼泊爾等流傳。由於漢傳佛教同藏傳佛教都係由印度往北傳播，所以統稱為北傳佛教。常見同佛教有關嘅圖案如佛祖、經文、符咒多為保平安之意，喺佛教不同教派中，對紋身一事亦有截然不同嘅睇法。

北傳佛教以大乘佛教為主流，主張普渡眾生，悲憫有情。認為佛法旨在為眾生帶嚟利益，可因時地人而調整同改變，所以融合咗好多中國嘅儒家思想同中華文化，受「身體髮膚受諸父母」孝道影響，漢傳佛教比較抗拒紋身。據《佛阿毘曇經·出家相品》：時比丘度紋身人出家受具足戒。時人訶怪：「雲何是等比丘度紋身人出家？夫出家者，形體端正。」比丘聞是事已即以白佛。佛言：「比丘不得度紋身人出家受具足戒。若度紋身人出家受具足戒者，得娑底娑羅。」意指對於一般信眾，並無明文規定，但如果出家人有紋身，就要遮蔽不可外露。而中國就有一個被稱為「最靚仔和尚」嘅出家人釋明心（而筆者認為唔靚仔），紋咗佢最鍾意嘅NBA球隊KINGS係小腿，不過佢係因為靚仔而出名，所以大家對於佢個紋身無咩意見。

至於南傳佛教就以上座部佛教為主，信徒應持戒，佛陀所制定之事不可胡亂更改添加。上座部佛教早有紋身嘅歷史，早至三千年前吳可時代已有刺符（สักยันต์）嘅記載。同一般紋身唔同，根據泰國史書記載，刺符為高級佛法法術，歷代泰王皆有高僧輔佐，當打仗時高僧無法同行，就會將已經加持嘅符咒紋於身上代替高僧，只有國王、將軍等有此待遇。時移世易，刺符一事已唔再係皇室專屬，而泰國刺符文化亦都傳至世界各地，有唔少人都專程飛去當地刺符，泰國政府每年三月都會舉辦紋身節(Wat Bang Phra Tattoo Festival)，以宣揚信仰及正確嘅紋身方式。刺符內容主要係一種叫「Yan」（ยันต์）嘅字符，混合咗高棉王朝文字（ขอม）、原始佛教梵文（สันสกฤต）或巴利文（บาลี）。現時最多人紋嘅係「五條經文/ ยันต์ห้าแถว」同「鎮魂虎符/ ยันต์เสือเหลียวหลัง」，有傳Angelina Jolie 就係刺完呢兩條符後星途就一帆風順。刺符首先要由跟隨高僧學習多年嘅師傅負責，顏料係用加持過嘅聖水加以染料調製而成，亦會用檀香油以達到無色效果；進行期間師傅會根據唔同圖騰而背誦唔同咒語，完成後亦會頌咒加持，再由高僧開光，祈求符咒可達到最大效力。符咒涵蓋各種意思：人緣、幫助修行、增強運氣、保平安、招財等等。