紋身字典 – 惡趣味風格紋身
唔同嘅美感喚來截然不同嘅共鳴最適合形容惡趣味風格紋身不過!無聽過呢種風格?正常嘅,因為相比起其他風格,佢比較近代興起。
鼻祖
呢種風格源自90年代巴黎塗鴉藝術家Fuzi UVTPK 減少塗鴉後,以紋身作另一個創作出口表達自己。佢受後末日電影如《Mad Max》所啟發,認為傳達自由訊息,遠比力臻完美重要,而事物都係一體兩面,可以既悲哀/做戲咁款,又可以搞笑,最緊要識得拎嚟講笑,因為人生就係咁。
Fuzi UVTPK 個人風格
佢嘅風格揉合暴力、諷刺同有趣嘅人和事,建基於紐約市初期塗鴉嘅模樣,睇落似啱啱學畫畫嘅少朋友作品,既天真又純粹,唔跟從任何規則。聽落伏伏地?佢曾經幫過Marvel電影系列《黑寡婦》Scarlett Johansson同美國電音組合Major Lazer成員Diplo紋身㗎。
Fuzi UVTPK對自己風格嘅睇法
「我唔在乎傳統紋身風格既定嘅規則,試都唔會試達到呢啲標準。我嘅目標唔係要創作好靚嘅作品/取悅人,而係奔赴險處、做與別不同嘅事同表達自己,但係我理解普羅大眾會唔理解我嘅風格。
你想要錦鯉紋身?閒閒地都有幾百個紋身師可以幫你紋到。你想要部落圖騰設計?去邊間紋身店都得。我創造緊完全獨特嘅作品,呢啲作品出於本能反應,建基於我嘅生活方式。」
咁普遍呢個風格嘅特點係點呢?
用虛無主義/黑色幽默嬉笑怒罵談人生
偶有言簡意賅嘅幽默短標題
同普羅大眾認知嘅「美感」或會不同,話明少講傳統唔跟規則
大多以黑線簡約地勾勒輪廓
圖案呈平面
少有陰影
致睇文字嘅人:
凡看文字的人是有福的,阿門!呢度係紋身說為你準備嘅悶蛋。黑色幽默
係源於1960年代嘅美國現代主義文學流派,抱住無可奈何的態度,以嬉笑怒罵談人生,冷嘲熱諷評時弊,由Bruce Jay Friedman將13個黑色幽默故事合集而成嘅《Black Humor》尊定呢個流派嘅存在。依家喺藝術同電影等創作領域亦非常流行,藝術例子有 @sirjoancornella ,電影例子有Fight Club。