2022年新搞作
新年快樂!祝你新一年紋身只需排1秒,個圖靚到人人都瞄一瞄!新年當然唔少得有新搞作,紋身說會喺2022年推出紋身搜尋網站🎊
點解要整網站?
每個星期,我哋都會收到超過10個pm問個別風格有咩推薦嘅紋身師。審美標準從來都係好主觀,尤其個紋身會喺你哋身上一世,所以我哋希望俾個易啲方法交由想紋身嘅你為自己身上嘅紋身作主,即使有偏好嘅風格都好,自己最清楚自己要咩嘛。
搜尋網站即係點?
就係打開個網站,想紋身嘅你可以根據風格搵紋身師同紋身作品,唔洗再只用一個hashtag大海撈針,而紋身師就可以有多一個渠道宣傳自己嘅作品,唔洗再單靠Instagram接觸有緣人,仲要睇住likes數做人。
我哋依家正密鑼緊鼓咁拜託紋身師朋友試用緊個網站,所以個網站仍然處於測試狀態,而目前有50-60個香港紋身師承諾會喺我哋網站擺放作品。
過去一年,我哋希望令各位followers認識更多來自香港同世界各地嘅紋身師,而呢一年我哋對自己嘅要求更高,就係令各位更易認識到風格啱你心水嘅紋身師,而紋身師亦都可以做到更多自己擅長風格嘅作品。大家要繼續支持紋身說啊啊啊🙌
P.S.仍然冇金主、仍然冇辦公室、3位仍然打緊工