詢問的禮儀

向紋身師問價同詳情嗰陣，經驗尚淺嘅朋友應該都會有無從入手嘅經歷。「紋身說」最近向紋身師收集意見，綜合成《諮詢的禮儀》，開心分享下有咩要注意，有咩最好唔好咁做。⁠
⁠
價錢⁠
西周生有云：「先小人後君子。」「紋身說」發現唔少紋身師對砍頭問價嘅客人心理陰影面積大過香港大球場。醒呀！紋身師都係有血有肉嘅人，唔係機械人嚟㗎，今時今日咁嘅態度唔得㗎，唔好再用「How Much」、「幾錢」和「＄？」呢啲兩字真言問價喇。⁠
⁠
再者，價格係受設計圖嘅大小、繁複程度同顏色等而定，所以最好畀咗你心入面想要嘅圖大概係點，之後先問價，咁係慳你亦都慳返紋身師嘅時間。⁠
⁠
個個紋身師收費程序唔同，多數都係畀咗訂金／設計金先，而訂金恕不退還，最後先畀結餘，記得先向紋身師了解整個程序喇，為咗少少錢搞到要放上社交平台解決就大家都唔好睇啦。⁠
⁠
價錢並唔只係紋身所花時間同功夫嘅收費，當中仲包括紋身師嘅「台下十年功」，如構思、起稿同改設計嘅心力。每次紋身嘅收費終生受用㗎，仲講價？⁠
⁠
如果價錢唔啱心水，講句「唔需要啦唔該晒」，怕太直接嘅話，可以講「我考慮下先，唔該」。⁠
⁠
設計⁠
「紋身說」知道除咗文字形容之外，參考圖都好重要，所以解釋自己理想嘅紋身構圖嗰陣，不妨畀多啲圖作參考。⁠
⁠
緊記唔好要求紋身師照抄，尊重知識產權同藝術價值係文明嘅表現，你都唔想自己好似某退休popo出洗白書偷蘋果日報啲圖咁難睇嘅！⁠
⁠
如果你想用紋身講自己嘅經歷／故事，請盡情當紋身師樹窿，再講明想加嘅元素、人物、生動或物件。⁠
⁠
部分紋身師有自己嘅藝術風格，留意多啲紋身師作品分享平台，了解係咪同你鍾意嘅風格相符，避免作品風格東不成西不就。⁠
⁠
個別紋身師或會基於宗教原因而唔接某啲圖案，請尊重紋身師個人意願。⁠
⁠
三項紋身師需要嘅資料： ⁠
1. 大細⁠
建議用公認單位提供紋身尺寸，如（厘米x厘米）和（寸x寸），唔好手掌／物件比喻大細，亦唔好提供設計圖同紋身作品等作大細指標。⁠
2. 顏色 ⁠
顏色分黑灰色同彩色兩大類別。黑灰色指用不同份量嘅清水倒入黑色墨水，調較出各深淺度嘅黑調。彩色指包括但唔限於黑色嘅紋身，你可以提出同圖示理想嘅顏色（調色產生器Adobe Color：https://color.adobe.com/zh/create/color-wheel）。膚色深淺會影響墨水顯色，膚色愈深會愈難顯色，所以除咗提供紋身顏色，如果你膚色黝黑啲，可以話埋畀紋身師知。⁠
3. 風格⁠
風格指傳統美式、傳統日式、寫實、動畫、插畫等，而陰影塑造技巧包括黑白轉換、素描、點繪等，不妨畀多啲參考圖。如果你想用紋身講自己經歷／故事，講得詳細啲，再講想加嘅元素、人物、生動或物件等。⁠